У Берасцейскай вобласці знайшлі рэдкі грыб

• 1.04.2025, 21:07

Фотафакт.

У Беларусі прадаўжаецца праца ў захаванні біяразнастайнасці. На гэты раз пад асаблівую абарону ўзялі месца вырастання рэдкага грыба – ганадэрмы бліскучай, таксама вядомага як лакаваны трутнік.

Адпаведная пастанова Ляхавіцкага райвыканкама апублікаваная на Нацыянальным прававым інтэрнэт-партале.

Месца росту гэтага грыба выявілі на тэрыторыі Крывошынскага лясніцтва. Пад ахову Ляхавіцкаму лясгасу перададзена 13 га лесу, дзе цяпер уводзіцца спецыяльны рэжым карыстання.

Цяпер на гэтай тэрыторыі забаронена:

правядзенне выбарачных і суцэльных высечак

уборка захламленасці і спальванне парубачных рэштак

выкарыстанне трэкавай тэхнікі

арганізацыя лесапрамысловых складоў, раскарчоўка пнёў

выкананне працаў, звязаных са змяненнем гідралагічнага рэжыму.

Ганадэрма бліскучая – рэдкі від, занесены ў Чырвоную кнігу Беларусі. Яна сустракаецца ў змешаных лясах, аддаючы перавагу пням і адмерлай драўніне клёну, алешыне, бярозе, дубу і елцы.

Гэты грыб не толькі мае прыродаахоўную каштоўнасць, але і выкарыстоўваецца ў традыцыйнай медыцыне.