У Менску п'яны кіроўца ўляцеў у трамвайны прыпынак

• 8.03.2025, 12:26

Колькасць праміле ў мужчыны за рулём Mercedes шакуе.

У Менску п'яны кіроўца Mercedes не справіўся з кіраваннем і рэзнуўся ў агароджу трамвайнага прыпынку на вуліцы Казлова.

На шчасце, абышлося без пацярпелых, але мужчына быў моцна п'яны – 1,92 праміле, паведамляе УДАІ ГУУС Менгарвыканкама.

Уначы 8 сакавіка 29-гадовы кіроўца аўтамабіля Mercedes не справіўся з кіраваннем і рэзнуўся ў агароджу трамвайнага прыпынку на вуліцы Казлова, недалёка ад дома №15.

На шчасце, у выніку аварыі ніхто не пацярпеў, аднак сам аўтамабіль атрымаў механічныя пашкоджанні.

На месца здарэння прыбылі супрацоўнікі аддзела ДАІ Партызанскага РУУС Менска. У кіроўцы былі заўважныя прыкметы алкагольнага ап'янення. Праведзены медыцынскі агляд пацвердзіў, што ў арганізме мужчыны ўтрымлівалася 1,92 праміле алкаголю.