Паляк Банька стаў адзіным кандыдатам на пасаду кіраўніка WADA

• 31.03.2025, 18:08

Ён узначальвае Сусветнае антыдопінгавае агенцтва з 2020 года.

Дзейны прэзідэнт Сусветнага антыдопінгавага агенцтва (WADA) Вітольд Банька будзе пераабірацца на гэтую пасаду 29 траўня на безальтэрнатыўнай аснове, паведаміла прэс-служба арганізацыі.

Выбары пройдуць на анлайн-пасяджэнні рады заснавальнікаў.

Банька ўзначальвае WADA з 2020 года.

На пасаду віцэ-прэзідэнта таксама зарэгістраваны толькі адзін кандыдат - гэта двухразовая алімпійская чэмпіёнка ў шорт-трэку кітаянка Ян Ян, якая займае гэтую пасаду з 2020 года.

Пасля перавыбрання паўнамоцтвы Банькі і Ян будуць дзейнічаць да канца 2028 года.

У 2024 годзе Банька казаў, што ўважае WADA за арганізацыю вялізнай геапалітычнай значнасці, у якой ёсць у руках свае «атамныя бомбы» ў выглядзе магчымасці ўводзіць санкцыі.

Раней Банька неаднаразова заяўляў аб недаверы да расейскай антыдопінгавай сістэмы.