Новы кіраўнік Мінэнэрга расказаў пра будаўніцтва другой АЭС у Беларусі

• 31.03.2025, 15:52

Мароз зрабіў першую заяву пасля прызначэння.

Новы міністр энэргетыкі Беларусі Дзяніс Мароз зрабіў першую заяву пасля прызначэння падчас кадравага дня, які правёў Лукашэнка 31 сакавіка, і сказаў пра будаўніцтва другой АЭС у Беларусі, паведамляе БелТА.

Мароз, гаворачы пра асноўныя задачы, якія стаяць перад ведамствам, заўважыў:

- Ставім перад сабой задачу - абмеркаванне і стварэнне даклада аб будаўніцтве другой беларускай атамнай электрастанцыі.

Новы міністр энэргетыкі, адказваючы на пытанне, на якім этапе зараз знаходзяцца перамовы аб магчымым будаўніцтве яшчэ адной АЭС у Беларусі, сказаў, што размова пра гэта адбылася на ўзроўні кіраўнікоў Беларусі і Расеі падчас афіцыйнага візіту Лукашэнкі ў РФ.

- Сапраўды, гэта тэма вельмі шчыльна абмяркоўваецца цяпер на самым высокім узроўні і цяпер ідзе падрыхтоўка да таго, каб правесці ўжо тэхнічныя перамовы аб тым, якія параметры, які кошт, на якіх умовах магчыма рэалізацыя гэтага аб'екта, - растлумачыў новы міністр энэргетыкі Беларусі.