Reuters: «Белавія» скупляе «авіягломазд» у Гамбіі

• 26.03.2025, 22:26

У Менск прыбылі тры самалёты ў дрэнным тэхнічным стане.

Заходнія санкцыі супраць беларускага і расейскага рэжымаў, уведзеныя пасля інцыдэнту з рэйсам Ryanair і ўварвання Масквы ва Украіну, прывялі да дэфіцыту самалётаў, асабліва буйных пасажырскіх, пішуць Глеб Сталяроў, Піліп Лебедзеў і Аляксандр Мараў у эксклюзіўным артыкуле для агенцтва Reuters (пераклад — сайт Charter97.org).

Як паведамляюць крыніцы агенцтва, праз санкцыі "Белавія" плануе папоўніць свой флот трыма адрамантаванымі самалётамі Airbus, якія раней належалі гамбійскай кампаніі Magic Air.

Са звестак Flightradar24, тры самалёты Airbus A330, зарэгістраваныя на Magic Air, прызямліліся ў Менску 17 жніўня 2024 года.

Тэхнічны стан самалётаў кепскі, аднак дзяржаўная авіякампанія "Белавія" плануе набыць іх і пачаць палёты ўжо ў гэтым вясенне-летнім сезоне, паведаміла адна з крыніц.

Заходнія санкцыі супраць Беларусі і Расеі накіраваны на абмежаванне доступу да запчастак для самалётаў, аднак многія краіны, уключаючы Гамбію, не далучыліся да гэтых абмежаванняў і не абавязаныя іх выконваць.

Magic Air - гэта малавядомая прыватная кампанія. Са звестак рэестра кампаній міністэрства юстыцыі Гамбіі, займаецца лізінгам і абслугоўваннем самалётаў.

Супраць Гамбіі не дзейнічаюць санкцыі, хаця асобныя судны патрапілі пад санкцыі ЗША, Вялікабрытаніі і ЕЗ за дапамогу Расеі ў абыходзе абмежаванняў на экспарт нафты. Галіновае выданне Aviation Week паведаміла ў жніўні 2024 года, што Magic Air адправіла ў Беларусь тры самалёты Airbus з Каіра, Стамбула і Маската.

Управа грамадзянскай авіяцыі Гамбіі (GCAA) паведаміла Reuters, што самалёты былі прададзеныя пакупніку з Аб'яднаных Арабскіх Эміратаў (ААЭ), перапраўлены ў Менск, а затым выдаленыя з рэестра Гамбіі 19 жніўня 2024 года.

Са слоў крыніц, увядзенне ў эксплуатацыю самалётаў Magic Air у Беларусі прасоўваецца марудна, бо яны прыбылі ў дрэнным тэхнічным стане.

Акрамя таго, паколькі "Белавія" лётае толькі на самалётах Boeing, яе пілотам давялося перавучыцца для кіравання Airbus.

Адная з крыніц паведаміла, што самалёты будуць перафарбаваныя ў колеры “Белавія” і могуць пачаць палёты ўжо ў сакавіку.