Баскетбольны клуб NBA прадаюць за рэкордныя $6,1 млрд

• 24.03.2025, 18:55

Гэты продаж стане самым дарагім у гісторыі амерыканскага прафесійнага спорту.

Уладальнікі «Бостан Сэлтыкс» пацвердзілі продаж баскетбольнага клуба за рэкордныя $6,1 млрд групе інвестараў на чале з Уільямам Чысхолмам, сузаснавальнікам кампаніі Symphony Technology Group. Аб гэтым піша выданне ESPN.

Угода яшчэ патрабуе адабрэння Рады кіраўнікоў Нацыянальнай баскетбольнай асацыяцыі і запланаваная на лета 2025 года.

Гэты продаж стане самым дарагім у гісторыі амерыканскага прафесійнага спорту, абышоўшы папярэдні рэкорд - продаж клуба Нацыянальнай футбольнай лігі «Вашынгтон» за $6,05 млрд у 2023 годзе.

Для параўнання: у тым жа годзе бізнэсовец Мэт Ішбія купіў каманду «Фінікс Санз» за $4 млрд, што тады было самай дарагой купляй у гісторыі NBA.