Трамп рыхтуе дэдлайн для Пуціна

• 22.03.2025, 8:42

Кіраўніку Крамля вызначаць крайні тэрмін.

Прэзідэнт ЗША Дональд Трамп не даваў расейскаму дыктатару Уладзіміру Пуціну крайні тэрмін для ўзгаднення рэжыму спынення агню з Украінай. Але выказаў меркаванне, што такі дэдлайн для кіраўніка Крамля можа быць у будучыні.

Пра гэта паведамляе NBC News.

Так амерыканскі лідар адказаў на пытанне прадстаўнікоў СМІ пра магчымы тэрмін, за які Пуцін павінен быў бы пагадзіцца на спыненне атак у рамках спробаў Трамп пакласці канец расейска-ўкраінскай вайне.

Разам з тым прэзідэнт Штатаў выказаў упэўненасць, што дамоўленасць будзе дасягнутая.

«Не было крайняга тэрміну. Але я думаю, што мы будзем мець адзін», – адказаў ён наконт дэдлайну.

Паводле словаў Трампа, «яны цяпер вельмі імкнуцца, як вы, відаць, бачылі абодвух, але я думаю, што мы гэта зробім даволі хутка».

Таксама амерыканскі прэзідэнт аспрэчыў сцвярджэнне, што Пуцін у нядаўняй тэлефоннай гутарцы з ім адхіліў прапанову Вашынгтона, узгодненую раней з Кіевам, пра 30-дзённае спыненне агню на ўсім тэатры ваенных дзеянняў паміж Украінай і РФ.

Трамп заявіў, што расейскі дыктатар «нічога не адхіляў». І дадаў, што ў дачыненні да Расеі дзейнічае «вельмі шмат санкцый, мабыць, у іх больш санкцый, чым у каго-небудзь».

Перад тым 21 сакавіка ў Белым доме прэзідэнт ЗША выказаў упэўненасць, што вайна РФ супраць Украіны неўнікнёна скончыцца, нягледзячы на тое, што Пуцін яшчэ не пагадзіўся на прапанову аб спыненні агню, часткова ўзгодненую ЗША.

«Сёння ў нас было некалькі добрых размоваў, і, магчыма, мы зможам як мага хутчэй спыніць марш смерці», – сказаў Трамп журналістам.

NBC News звяртае ўвагу, што застаецца незразумелым, якія менавіта размовы меў на ўвазе прэзідэнт Штатаў, але раней на гэтым тыдні ён размаўляў як з Пуціным, так і з прэзідэнтам Украіны Уладзімірам Зяленскім.