Латвійскія памежнікі: Гэта апошняе папярэджанне Беларусі
- 18.03.2025, 12:08
Рыга часткова закрые памежны пераход на беларускай мяжы.
Прафілактычная мера - часовае прыпыненне працы пункта перасячэння мяжы ў Беларусь "Патэрніекі" (з беларускага боку пункт пропуску "Грыгарошчына") - дала вынік, заявіў кіраўнік Дзяржаўнай памежнай аховы (ДПА) Латвіі Гунтыс Пуятс, піша DELFI.
«Цяпер сітуацыя на мяжы стабільная, і часовае прыпыненне працы прапускнога пункта дало эфект. Учора на тэрыторыі Беларусі была заўважаная група мігрантаў, але службы суседняй дзяржавы іх не прапусцілі, магчыма, улічваючы дзеянні латвійскіх памежнікаў», - распавёў Пуятс.
У нядзелю, 16 сакавіка, была заўважаная група з прыкладна 30 чалавек, у якой дамінавалі мужчыны ва ўзросце ад 20 да 35 гадоў. “Яны прыходзяць, не ведаю, на што яны спадзяюцца, у іх няма ні візаў, ні дазволаў на пражыванне. Мы разумеем, што гэта інструменталізацыя міграцыі”, - сказаў ён.
Кіраўнік латвійскай службы адзначыў, што мігранты вярнуліся ў Беларусь, дзе яны могуць легальна знаходзіцца, бо маюць візы Расеі або Беларусі, што дае ім магчымасць з'яўляцца і ў іншых месцах на латвійскай мяжы.
“Праблемы трэба развязваць, калі яны ўзнікаюць. Кожны наступны крок не будзем прадказваць, але, відаць, гэта апошняе папярэджанне Беларусі, што кантрольны пункт можа быць цалкам закрыты, і застанецца толькі адзін адкрыты пункт на мяжы з Літвой і Польшчай. Таксама не выключана магчымасць, што Літва і Польшча могуць прыняць пастанову аб закрыцці памежных пунктаў, што прывядзе да поўнай ізаляцыі Беларусі», - сказаў Пуятс.
Сёння, 18 сакавіка, урад Латвіі разгледзіць праект пастановы аб тым, што латвійска-беларускі памежны пераход "Патэрніекі — Грыгароўшчына", а таксама пункты латвійска-расейскай мяжы "Грэбнева" і "Церахава" можна будзе перасякаць толькі на аўтамабілях. Такім чынам дзяржава мае намер змагацца з прытокам у Латвію нелегальных пешых мігрантаў, а таксама мігрантаў-веласіпедыстаў.